Больш за 20 міні-футбольных палёў з'явілася ў Гомельскай вобласці па сацпраекце

29.08.2022

Больш за 20 міні-футбольных палёў з'явілася ў Гомельскай вобласці па сацпраекце

Больш за 20 міні-футбольных палёў з'явілася ў Гомельскай вобласці за час рэалізацыі (з 2012 года) сацыяльнага праекта "Bonfesto - дзецям". Аб гэтым паведаміў сёння на апаратнай нарадзе ў аблвыканкаме начальнік упраўлення спорту і турызму Павел Старасвецкі, перадае карэспандэнт БЕЛТА.

Кіраўнік нагадаў: па сацыяльным праекце будуюцца міні-футбольныя палі памерам 20х40 м. "Прадугледжана добраўпарадкаванне асновы за кошт адміністрацыйна-тэрытарыяльных адзінак, а ўкладка пакрыцця і агароджы за кошт ААТ "Тураўскі малочны камбінат" і асацыяцыі "Беларуская федэрацыя футбола", - удакладніў ён.

Паводле слоў начальніка ўпраўлення, усяго за час праекта ў раёнах Гомельскай вобласці пабудавана 21 міні-футбольная пляцоўка 20х40 м са штучным пакрыццём. Акрамя таго, пры падтрымцы Беларускай федэрацыі футбола дадаткова ўзвялі 10.

Рыхтуюцца пляцоўкі ў Брагінскім, Веткаўскім, Лоеўскім і Чачэрскім раёнах.

Так, у гарадскім пасёлку Камарын Брагінскага раёна яе размяшчаюць на тэрыторыі цэнтра творчасці дзяцей і моладзі. Ужо зрэзаны верхні раслінны слой, завезены пясок для падсыпкі. У аграгарадку Радуга Веткаўскага раёна і ў Лоеве работы плануецца выканаць на тэрыторыі сярэдніх школ. Гатоўнасць міні-футбольнага поля ў гімназіі ў Чачэрску складае 85 працэнтаў.

"Задача - да 5 верасня закончыць усе пляцоўкі, каб туды прыйшлі займацца спортам дзеці, моладзь", - падкрэсліў старшыня аблвыканкама Іван Крупко.

Павел Старасвецкі дадаў, што ў гэтым годзе сацыяльны праект завяршаецца.