Палажэнне аб гербе горада Мазыра і Мазырскага раёна

Герб

Сучасны герб Мазыра "На блакітным гербавым шчыце з выразамі па баках ("барочнай формы") чорны гербавы арол з залатым языком і лапамі, з падоўжаным "гатычным" хвастом" зарэгістраваны дзяржаўнай геральдычнай службай 18 мая 2001 года і ўключаны ў Гербавы Матрыкул Рэспублікі Беларусь пад №61.

Герб г. Мазыра з'яўляецца яго сімвалам і валодае афіцыйным статусам. Належыць да ліку найбольш каштоўных геральдычных помнікаў Беларусі, бо адносіцца да гербаў самага ранняга "вялікакняскага" перыяду.

Магдэбургскае права або права на самакіраванне і ўласны герб Мазыр атрымаў 28 студзеня 1577 г. згодна грамаце вялікага князя літоўскага і караля Рэчы Паспалітай Стэфана Баторыя.

Спачатку пячатка горада выглядала наступным чынам: аднагаловы арол. Каралеўскай граматай 1609 г. кароль Рэчы Паспалітай Жыгімонт lll Ваза зацвердзіў гарадскі герб у выглядзе чорнага арла на фігурным шчыце блакітнага фону з распасцёртымі крыламі і галавой, павернутай у правы бок. На серабрыстым шчыце, размешчаным на грудзях арла, з'явілася лацінская літара S.

Герб г. Мазыра XVII ст.

У 1776 г. у Рэчы Паспалітай было прынята рашэнне аб ліквідацыі Магдэбургскага права ў маленькіх гарадах і мястэчках Вялікага Княства Літоўскага. Права на самакіраванне захавалася толькі ў 11 гарадоў, сярод іх быў і Мазыр. Пасля далучэння беларускіх зямель да Расійскай імперыі ўсе гербы гарадоў былі скасаваны або зроблена іх новая рэдакцыя. Чорны арол – гэта сімвал імператарскай улады ў Расіі, таму гораду пашанцавала, і ён атрымаў у 1796 г. герб у новай рэдакцыі. Ён быў падзелены на дзве гарызантальныя часткі. У кожнай па чорным арле. У верхняй – двухгаловы арол з каронай і шчытом на грудзях з выявай праваслаўнай святой, у ніжняй – аднагаловы арол без шчыта.