Мазырскі

З рэканструкцыяй аўтамабільнай дарогі М10 граніца РФ (Селішча) - Гомель - Кобрын (109,9-195,15 км)азнаёміўся намеснік прэм'ер-міністра Аляксандр Церахаў, перадае карэспандэнт БЕЛТА.

"Магістраль M10 з'яўляецца ключавой для нашай краіны. Па даручэнні Прэзідэнта рэалізуецца маштабны праект па рэканструкцыі - практычна ад рэчыцкага скрыжавання да абходу горада Калінкавічы, гэта значыць будзе злучана магістраль з выездам на Мазыр, Калінкавічы і далей на Мінск. Такая своеасаблівая, можна сказаць, закальцоўка", - адзначыў Аляксандр Церахаў.
Агульная будаўнічая даўжыня рэканструкцыі аўтадарогі М10 складае больш за 85 км. Аб'ект падзелены на пяць чэргаў. Будаўнічая даўжыня першай чаргі - звыш 16 км.

"Завяршаецца рэканструкцыя першай чаргі. Дарожныя будаўнікі паспяхова спраўляюцца. У верасні будзе падпісаны акт уводу першай чаргі дзяржаўнай камісіяй", - абазначыў тэрміны намеснік прэм'ер-міністра.

"Сёння мы ацанілі магчымасці падрыхтоўкі да рэалізацыі наступных чэргаў. Гэта і наяўнасць распрацаванай праектнай дакументацыі, фінансавання. Плаўна пераходзім у рэалізацыю другой чаргі. У цэлым па даручэнні кіраўніка дзяржавы ў 2029 годзе павінны быць завершаны асноўныя будаўнічыя работы з уводам аб'екта ў 2030 годзе. Рэканструкцыя ідзе згодна з планам, тэрміны вытрымліваюцца, - сказаў Аляксандр Церахаў. - Не бачым праблем па рэалізацыі праекта".
Намеснік прэм'ер-міністра адзначыў і важныя складнікі зладжанай работы на аб'екце. "Гэта сплаў. Па-першае, наяўнасць фінансавання, па-другое, адказнасць мясцовых кіраўнікоў. І разуменне вадзіцеляў, што часовыя нязручнасці хутка завершацца, і траса будзе суперузроўню - у чатырохпалосным выкананні, з усімі атрыбутамі бяспечных элементаў", - зрабіў акцэнт ён.

Аб аспектах рэалізацыі праекта расказалі міністр транспарту і камунікацый Аляксей Ляхновіч, намеснік старшыні Гомельскага аблвыканкама Андрэй Бараноўскі.
Заказчыкам на аб'екце выступае РУП "Гомельаўтадар". "Па першай чарзе ўжо выкананы работы па ўладкаванні бетоннага пакрыцця, прадаўжаюцца работы па ўладкаванні асфальтабетоннага пакрыцця, устанаўліваюцца бар'ерныя агароджы, дарожныя знакі, асвятляльныя апоры. Выкананы работы па арганізацыі трох падземных пешаходных пераходаў. Ідзе азеляненне транспартнай развязкі. Работы вядуцца ўсе ў тэрмін, нават з апярэджаннем", - звярнуў увагу генеральны дырэктар прадпрыемства Дзяніс Ясько.

Генеральны падрадчык на аб'екце - ААТ "ДБТ нумар 2, г.Гомель", начальнік участка філіяла ДБУ нумар 1 ААТ "ДБТ нумар 2, г. Гомель" Дзяніс Кавалёў дадаў: "Работы ў большай ступені падыходзяць да канца. Сама карцінка вымалёўваецца". Паводле яго слоў, на аб'екце працуюць каля 100 чалавек, штодзённа задзейнічана 30-35 адзінак рухомага саставу.

Дзяніс Ясько адзначыў, што па другой чарзе вядуцца праектна-пошукавыя работы. "Праект знаходзіцца на экспертызе. Чакаем выхаду яго ў жніўні", - удакладніў кіраўнік.

БЕЛТА